as.Turismo

Esta comarca tien una gran producción quesera y los sos frutos puen atopase dende les costes del oriente asturianu hasta l’interior de los valles y cumales de Picos d'Europa. Con esta bayura, güei vamos escoyer una de les xoyes queseres d'Asturies, el quesu Gamonéu. Ye un quesu graso, madurecío, de corteza natural, fecho con lleche de vaca, oveya y cabra, llixeramente afumao y con pingaratines de penicillium nos cantos. Hai dos variedaes, la del Puertu y la del Valle, según se faiga nes mayaes altes de los Picos o nos valles. Tien un fuerte sabor que remembra al afumáu.

Como visita: Encamentámoste visitar les zones de producción d'esti quesu, que son los conceyos d'Onís y de Cangues d'Onís, nel corazón del Parque Nacional de los Picos d'Europa. Hai que percorrer les sos capitales y pueblos, como Benia, Avín, La Robellada, Demués o Sirviella n'Onís y en Cangues d'Onís, Les Mestes, Corao, Llabra o Gamonéu.

Visita y preba: pueden visitase delles queseríes en Cangues d’Onís, como la de Juan Sobrecueva o La Solana, en Ñeda. N'Onís atopamos la quesería Vega d'Ariu en Benia o El Huervu n’Avín. Por dicir dellos de los 20 ellaboradores que supieron recuperar esta tradición tan vieya. http://www.quesogamonedo.com

Tradición y naturaleza. A les mayaes de los Picos d'Europa xuben los últimos pastores que faen el Gamonéu del Puertu y que cada añu acompañen a les sos recielles pa buscar pastu. La subida en primavera y la baxada a los pueblos, n’entrando la seronda, ye un espectáculu dignu d’acolumbrar, almirar y respetar.

Les mayaes son l'elementu principal nos espacios altos, al ser terrén llanu y con abondo pasto, y tán constituyíes por cabañes, corrales, tendayos, cuerres y fresnos. Nelles recuéyese'l ganáu tolos díes p’atendelo y catalo.

L'arquiteutura de les mayaes fala de la sabiduría popular, si nos decatamos del so grau d'adautación y la so integración nel paisaxe.

Cultura y paisaxe. Visitamos la mayada de Gumartini y la zona de los llagos pa tornar hacia Cangues d'Onís pel mesmu camín; o como alternativa siguimos escontra Los Llagos y per una sienda en direición sureste vamos hasta la mayada de Belbín, baxando dempués pela carretera escontra'l valle que va dar a Demués, onde vamos visitar el Muséu de los Pastores de Picos d'Europa, asitiáu na antigua escuela onde s'ufierta museografía rellacionada col recursu de los quesos y, sobre manera, del Gamonéu, pa baxar hacia Benia.

El percorríu remata con una visita a dos espacios museísticos: el centru d'interpretación de la fauna glacial de Picos d'Europa, onde s’atopen los únicos restos de rinoceronte llanudu d'estes tierres y el Centru del Frangüesu, onde van date una información clara al rodiu de la biodiversidá qu’hai nos Picos d'Europa.

Si tienes tiempu, nun dexes de visitar Cuadonga, onde vas poder acolumbrar una bárbara combinación d’arquiteutura relixosa, montes y saltos, y dende onde vas poder garrar la carretera que sube a Los Llagos de Cuadonga pa ver nel so máximu esplendor los picos onde se fai’l quesu que nos traxeron hasta equí.

Artesanía y gastronomía. El certame del Gamonéu celébrase nel mes d'ochobre en Benia, bona oportunidá p’acercase y ver la esposición quesera de tolos ellaboradores y onde s'escueye'l meyor quesu del añu; los domingos tenemos el mercáu de Cangues d'Onís onde pueden atopase tolos productos de la güerta de la redolada, amás d'artesanía y otros productos agroalimentarios.