Sidra a esgaya
Nesta ciudá, siéntese y vívese la sidra. Ye casi imposible visitar la ciudá ensin tastiar la sidra, ensin apalpar l'ambiente de xaréu y folixa que s'alienda, y facer por echar un culín col brazu tiesu. La cosa nun ye tan cenciella como paez, pero ye prestosa. Hai auténticos profesionales qu'echen la sidra mirando de frente, sientiendo'l golpiar del líquidu escontra'l vasu y calculando con exactitú la cantidá que cai.
Xixón va convertise en “la gran mazana”. Da-y un ñascu, que nun lo facer será pecáu.
EVENTOS SIDREROS
ABRIL - Primer Sidra l’Añu
La primer edición celebróse nel 2010 nel Pueblu d’Asturies y participaron más de 60 llagares. Trátase de ser los primeros n’amosar la sidra de la nueva collecha, que se complementa nesti casu con quesos, embutíos y productos artesanos.
XUNU – Xornada sidra DOP
La Denominación d'Orixe Protexida Sidra d'Asturies tamién tien el so propiu eventu. Les sidres con contraetiqueta del Conseyu Regulador salen al mercáu en xunu, y celébrenlo con unes xornaes gastronómiques de sidra DOP.
AGOSTU – Festival de la sidra natural de Xixón – Fiesta d'Interés Turísticu Rexonal
Ye ún de los festivales más importantes d'Europa. Cada añu aconceyen milenta persones demientres l’últimu fin de selmana de agostu, que van al Record Guinness d'escanciáu al tiempu, ven el concursu d'escanciadores y valoren les más de trenta sidres del certame. Amás pónse en marcha l'autobús de la sidra, que dexa visitar los llagares.
OCHOBRE – Xixón de Sidra
Quier facer por recuperar la cultura sidrera y recuérdanos que les sidreríes son muncho más qu'un llugar d'alcuentru. Nesti certame los meyores palos de sidra acompáñense de cazueles que dexen tastiar la meyor gastronomía tradicional asturiana.
COSES QUE TENEMOS DE SABER
- La sidra bébese per botelles, non per copes o vasos. D'una botella salen seis o siete culinos, que ye la cantidá de bebida que cai en vasu en cada escanciáu.
- Cada culín tien de bebese d'un tragu, porque nun sabe igual si se tarda en bebelo.
- Suel dexase un poco en vasu, que se tira en suelu pel sitiu per onde bebimos pa dexar el vasu llimpiu pal siguiente tragu.
- Hai una Denominación d'Orixe y otra marca de calidá nomada Sidra de Mazana Seleicionao. Dambes tienen esixentes controles de calidá, siendo obligatoriu nel primer casu que la mazana seya asturiano.
- La sidra casa perbién con casi too: pexes y mariscos, arroces marineros, fabada, quesos (hai auténticos apasionaos de la combinación col Cabrales)…
- La espicha ye la forma más especial de consumu de sidra. Fáise nos llagares, direutamente de los toneles, y dexa entender la cultura y les tradiciones asturianes.
