Monumentos
Nel barriu de Cimavilla axúntense bien de los monumentos locales como'l Palaciu de Revillaxixéu, la Colexata de San Xuan Bautista y les capielles de La Soledá y Los Remedios. Atestando cola cabera alcontrase la Casa Natal de Xovellanos, un palaciu típicu asturianu del sieglu XV y anguaño Muséu de Xixón.
Pa lo cimero de Cimavilla y cara a la mar podemos ver la monumental obra escultórica Eloxu del Horizonte, puesta ellí pol artista Eduardo Chillida nel añu 1990. Nel ensanche xixonés sálennos al pasu edificios tan notables como l'Institutu Xovellanos, anguaño centru de munches actividaes culturales, pero tamién numberosos exemplos d'arquitectura modernista de primeros del sieglu XX y del racionalismu, que dexó en Xixón obres mui señeres.
En saliendo p'afuera de la ciudá ye obligao visitar ilesiuques romániques como les de San Andrés de Ciares y San Xuan de Fano, palacios como'l de San Andrés de Curniana (convertíu n'Albergue Xuvenil) o en Somió l'ablayante Palaciu de los Bauer, d'estilu modernista.
