Historia
El revueltu mar Cantábrico qu'abraza la ciudá de Xixón vien marcando la so historia a lo llargo de más de 5000 años.Mar de la Ruta de la Plata, Xixón caltién vivu'l so pasáu romanu al traviés de les intervenciones que se fixeron nel Parque arqueolóxicu de la Campa Torres , ún de los poblaos fortificaos más importantes del norte d'España (primero del 490 a.C.) y, sobremanera, nel recuperáu complexu termal del Campu Valdés , edificiu públicu que data de últimos del s. I d.C.
A lo llargo de la Edá Media , caltiense una ocupación del territoriu de la que nos queda l'alcordanza gracies a les ilesies romániques fechaes nos sieglos XII y XIII. La fundación de la Puebla en 1270 lleva arreyada una expansión urbana qu'acaba a últimos del sieglu XIV, cuando Xixón ye l'escenariu de les engarraes de los Trastámara qu'acabaron cásique esfarraplando dafechu la ciudá.Nel sieglu XVIII, l'ilustráu Gaspar Melchor de Xovellanos trazó los exes del desarrollu de Xixón. El procesu d'industrialización , dende mediaos del sieglu XIX, convirtió a la ciudá nel centru industrial d'Asturies col potente Puertu d'El Musel, astilleros y
abondancia de fábriques.El procesu de modernización de la villa y les estupendísimes condiciones naturales de la mesma fixeron de Xixón una ciudá que, con un potente sector servicios y una bona ufierta cultural y deportiva, atrae un númberu cada vez más grande de visitantes. Xixón esfuérzase agora qu'entama esti sieglu en caltener el pásáu históricu que tien y enseñalu como exemplu de la so escelencia turística.
